Кралскиот Мароко

Го започнуваме нашиот факултативен излет низ Маракеш наутро со прошетка низ Мел (еврејскиот кварт), во кој се сместени најстарата синагога во градот, како и еврејски гробишта. Ја посетуваме Ел Бахија, палата од 19 век која со децении, служела како резиденција на големите везири. Нејзината градина се смета за една од најубавите во целиот Мароко и градина на која сите везири биле особено горди. Ја посетуваме и палатата Ел Бади, односно Величенствената палата. Изградена е во времето на султанот Ахмед Ал Мансур во втората половина на шеснаесеттиот век. Тој бил современик и сојузник на кралицата Елизабета I на Англија. Влегол во историјата на светот како еден од најмоќните и најбогатите султани. Важел за голем дипломат, градител, освојувач и заштитник на уметноста. Вистинска ренесансна личност длабоко во подножјето на митската планина Атлас. Султанот Ахмед Ал Мансур потекнувал од династијата Саади, чии гробници се наоѓаат недалеку од самата палата. По палатата, истражувајќи влегуваме во улица, покриена од сонцето, преполнета со тезги и луѓе што брзаат некаде „како муви без глави“. Кој нема да прозборува тука арапски или берберски, исто како да не бил во Мароко. Стотици улични продавачи ги продаваат своите ракотворби. Жените со тетоважи ни ја покажуваат уметноста нацртана на рацете и на лицето, нудејќи ни ја нивната уметност, додека безброј скутери се обидуваат да се пробијат низ толпата луѓе. Шетајќи низ Казба, пред нас се појавува најубавата порта на градот - Баб Агнау. Таа е една од 19-те порти на Маракеш и е изградена во 12 век за време на династијата Алмохад.

Ја продолжуваме нашата авантура и ја посетуваме една од најубавите џамии во градот. Тоа е џамијата Кутуби која како светилник, посочува излез на сите оние што залутале по тесните улички на стариот град. На огромното плато околу џамијата, гледаме остатоци од еден стар храм и палати на владетели од династијата Алморавид, втората мароканска династија по ред и една од најмоќните африкански династии досега. Пред џамијата, туристите ги пречекуваат кочијаши со украсени кочии и моќни арапски коњи, но ние продолжуваме со лежерна прошетка низ Црвениот град. Кочијашите се сметаат за исклучително умешни преговарачи, а ние го имаме целиот ден за да го совладаме ценкањето во овој град кој никогаш не спие. Пригушениот звук се засилува додека се приближуваме кон јадрото, и на крајот ја гледаме заслепувачката светлина и срцето на стариот град. Огромниот плоштад на Џема ел Фна, симболот на Маракеш, се наоѓа точно пред нас. Поради неговата автентичност, самиот плоштад се наоѓа на списокот за светско наследство на УНЕСКО. Многу туристи се заљубиле во Маракеш поради плоштадот и се враќаат во него одново и одново. Смртните казни некогаш се изведувале овде, а плоштадот следејќи го тоа го исткајал својот дух. Денес има безброј тезги на местото на страшните џелати, каде ќе купиме свежо исцедени овошни сокови, кои се подготвени на лице место од насмеаните продавачи. Ќе навлегуваме подлабоко во суковите на медината. Во овие улички можеме да купиме скоро сè, од игла до локомотива. Искусните преговарачи можат да излезат со цела вреќа со сувенири за одлична цена. Уметноста на договарањето е исклучително тешка, а продавачите на Маракеш се дефинитивно господари на нивниот занает, затоа мора да бидеме упорни, непопустливи и храбри. На крајот, некој секогаш некој попушта, на обострано е задоволството. Враќање во сместувањето во попладневните часови. 

Во цената на излетот е вклучено:

• професионален лиценциран водич на англиски јазик
• организиран превоз според планот и програмата
• влез во палатата Ел Бахи

Во цената на излетот не е вклучено:

• ручек

Водопадите Оuzoud се највисоките водопади во Северна Африка и втори највисоки во цела Африка. Достигнуваат до 110 метри висина. Тие се пробиват низ области со антички маслинови градини кои се дом на мајмуни. Околу водопадите се населени домородните берберски племиња од планината Атлас. Поаѓањето за овој излет е рано наутро. По возењето доаѓаме до мало населено место во близина на водопадите. Се чувствува мирисот на вода, маслинки и свежи планински билки. Одиме до самиот врв на водопадот, додека крвта ни замрзнува од напливот на моќната вода. Со звукот на водопадите што се удираат во камењата слушаме и кршење на гранки. На дрвата над нас се качуваат мајмуни, се дофрлаат со храна и им приоѓаат на посетителите. Одиме по патеки низ маслинови градини уживајќи во мирисот и интересните приказни за локалниот живот. По кратката прошетка гледаме стара берберска куќа каде луѓето сè уште живеат. Се запознаваме со животот на Берберите и нивната богата традиција и разновидност. Стануваме свесни за неверојатната култура скриена од овие древни народи. Го учиме берберското писмо и зборови, но и како изгледа секојдневието. Продолжуваме со прошетка низ селото и повторно влегуваме во маслиновите градини. Почнуваме полека да се спуштаме до подножјето на водопадот по овој див терен. Старите жени поминуваат со магариња натоварени со маслинки, а љубопитните мајмуни ни приоѓаат со надеж дека ќе добијат нешто за грицкање. Локалниот водич ни кажува за мајмуните и ни објаснува како треба да се однесуваме во нивна близина. Се фотографираме со нив додека се качуваат околу нас. Стигнуваме до подножјето на водопадот и остануваме без здив. Силата на водопадот, мирисот и бучавата целосно нè обземаат. Се одмораме и го пиеме најдобриот сок од портокал. Се качуваме во чамците и се приближуваме многу блиску до водопадот. Луѓето се капат, пеат и се дружат. Правиме пауза и чекаме шанса да се појави виножито – најубавата глетка на овие водопади! Продолжуваме со прошетката по ридот преполнет со продавници и ресторани, учејќи за прекрасната моќ на локалните билки и чаеви. Ги оставаме мајмуните да шетаат низ природата, а ние се упатуваме во еден од рестораните. Уживаме во највкусниот таџин, кускус, ражничи, салата и најдобрите маслинки од околината на водопадот. По краткиот одмор се враќаме во сместувањето. 

Во цената на излетот е вклучено:

• професионален лиценциран водич на англиски јазик
• организиран превоз според програмата
• влез за локалитет
• возење со чамец

Во цената на излетот не е вклучено:

• ручек

Есауира, синиот град на брегот на Атлантикот, со уметнички продавнички, галеби, сини чамци и шарени пазари, е еден од градовите што задолжително мора да го посетиме. Ќе јадеме таџита и пиеме црн чај со две коцки шеќер, како вистински Мароканци. Во поранешниот Могадор, снимана е една од најпопуларните серии денес - Game of Thrones.

Ден за уживање и опуштање! На пат кон океанот, ќе сретнеме и кози, кои стоејќи мирно на дрво, им пркосат на законите на физиката. Потоа, доаѓаме до автентична работилница за производство на масло од арган, каде слушаме приказни за неговите својства и употреба и го гледаме целиот процес на изработка, како и слободно време за купување. Се возиме низ традиционалните и живописни пејзажи до Есаура. Магичната Есауира со прекрасни рустикални кули и sидини и исклучително убавата плажа, каде Мароканците шетаат и играат фудбал на песокот. Ќе прошетаме кратко по познатото пристаниште, каде локалците постојано доаѓаат со своите сини чамци, ја растовараат целата риба и ги поправаат нивните мрежи. Потоа, одиме низ sидините, уживајќи во приказната за местото каде е сниман Game of Thrones. Купуваме сувенири и свежо овошје на главната улица, а потоа одиме на уникатно гастрономско уживање - свежа морска храна уловена истото утро! Пред нашите очи, локалците чистат различни видови на вкусни морски плодови и риби и си бираме што сакаме да јадеме и ги гледаме како брзо ја приготвуваат храната. По пријатниот ручек имаме слободно време за прошетка и купување сувенири, по што се враќаме во сместување. 

Во цената на излетот е вклучено: билет за кулите Скала ду Порт, локален водич, претставник од агенција, организиран превоз според планот и програмата. 

Цената на излетот не е вклучено: каде што е снимана серијата „Game of Thrones“ (10MAD), ручек.

Разгледување на Рабат - Рабат е главен град на Мароко и една од четирите престолнини и хронолошки последна во низата официјални престолнини (покрај Маракеш, Фес и Мекнес). Во него е сместен посебен дел од градот, опкружен со sидови, што ја формира Кралската палата заедно со нејзината администрација. Го посетуваме мавзолејот на првиот марокански крал по независноста, Мухамед V, кој го наследува неговиот син Хасан Втори. По мавзолејот, ги посетуваме знаменитостите на стариот град во кој траен печат оставиле Мурите, бегалци од Андалузија. Во слободното време, уживаме во погледот на влевањето на реката Бу Регер во Атлантскиот океан.

Во цената на на излетот е вклучено: услуга од лиценциран водич на англиски јазик.

Двајца владетели со исто име, освојувајќи ги огромните ширини на најзападните области на тогаш познатиот свет под зеленото знаме на исламот, ја подигнале првата мароканска престолнина на крајот на осмиот век. Идрис Први ја изградил Медината Фeс, a неговиот син Идрис Втори ја изградил населбата Ал Али. Градот Фес е создаден со спојување на овие населени места. Најдолго се сметал за главен град на Мароко. Речиси сите династии што владееле со огромни територии во северна Африка се бореле околу него затоа што тој бил на важен трговски пат. Денес, Фес е важен туристички, културен, историски и религиозен центар кој љубоморно ја чува турбулентната историја на Магреб, односно најзападното кралство на Исламот. Ја вклучуваме временската машина и се упатуваме кон стариот град.

Временската машина е побавна од вообичаеното затоа што трговците, магарињата, продавачите на кактуси и скутерите ни го попречуваат патот кон медината. Се пробиваме полека низ гужвата и правливите ходници на историјата.

Првата дестинација е Дар ал Макзен, резиденцијата на владетелите на династијата Алавита, од која потекнува сегашниот крал Мухамед VI. Недалеку од палатата, постои антички еврејски кварт наречен Мела. Оваа населба била изградена од неколку еврејски генерации. Темелите ги поставиле еврејските трговци уште на самиот почеток на историјата на градот. Надградбата ја продолжиле Евреите, кои бегајќи од шпанското освојување, пронашле прибежиште кај своите сонародници и пријателски настроените муслимани.

Мела, како да ни кажува што не чека во медината. Невообичаено тесни улички, дотраени фасади насликани во светло сина боја, деца со полу- искината топка и дресови на Кристијан Роналдо и Меси, сувенири и занаетчии... Се разбира, ова е само мала увертира за оваа античка населба, затоа што медината е скоро невозможно да се опише со зборови. По прошетката низ Мела и посетата на античката синагога која денес служи како музеј, се упатуваме кон медината. Толпата се зголемува, температурата се покачува онака како што и очекувавме. Пред нас е конечно Bab Bou Jeloud, односно Сината порта, која е главниот влез во медината. Sидовите околу медината биле изградени од владетели од династијата Алморавид кои владееле во XI век. Сепак, оваа порта е малку помодерна од другите порти во градот. Најзаслужен за нејзината изградба е францускиот генерал Ибер Лиот, командантот на Мароко од почетокот на XX век, кога Мароко бил под францускиот протекторат. Поминуваме низ портата и влегуваме во земјата на чудата. Целата медина останала непроменета од нејзиното создавање. Речиси е невозможно да се остане рамнодушен во овој лавиринт од тесни улици. Илјадници луѓе секој момент поминуваат низ уличките и стотици трговци, секој со посебна приказна, се обидуваат да ни го привлечат вниманието.

Ја посетуваме медресата на Каравија. Медресата е исламска верзија на универзитетите каде што се изучувале Куранот и другите религиозни текстови. Она што ја прави оваа медреса посебна е тоа што е постара од сите европски универзитети. Изградена е во средината на XI век и се смета за најстара во светот! Изградена е од страна на Фатима Ал Фихри, која била ќерка на богат трговец од денешен Тунис. Има и библиотека во која се зачувани над 4.000 ракописи од создавањето на оваа медреса и џамија со истото име.

Продолжуваме со прошетка низ суковите и тесните премини и се движиме кон античкиот мавзолеј каде се чуваат телата на основачите на Фес, Идрис Први и Идрис Втори. Навлегуваме подлабоко во медината и доаѓаме до една од најпознатите туристички атракции на Фес. Овде се работилниците во кои се штави кожа и ќе побараме од некој од локалните жители да не одведе на терасите за да го видиме процесот што не е сменет со векови. Непријатната миризба која се создава ќе ја ублажиме мирисајќи ливче од нане кое ќе ни го дадат локалците. Доколку некој сака може да си купи производ изработен од кожа, која многумина ја сметаат за најквалитетна во светот. Нашата авантура полека завршува, а на враќањето ќе посетиме продавница со производи од арган, плоштадот Сефарин на кој и денес се продаваат автентични метални производи, а недалеку од плоштадот се наоѓа и Музејот за дрвени ракотворби Нежарин. Во моментот кога ќе ја видиме Зелената порта е и крајот на нашата денешна авантура. Всушност ова е Сината порта од каде ја започнавме обиколката околу градот. Од внатрешната страна на медината Сината порта е зелена. Нека ова место биде како главна ориентациона точка за авантуристите кои би сакале да шетаат и истражуваат самостојно, за време на нашиот престој во овој град од „Илјада и една ноќ“. 

Не можете да бидете вистински жител на градот Фес, доколку не се изгубите барем еднаш! Бидете внимателни затоа што итрите жители на Медина и од тоа имаат направено бизнис. Ако се изгубите, ќе треба да платите за да ве извадат од медината. Доколку се најдете во ваква ситуација не паничете затоа што тоа е само игра за нив. По кратко ценкање околу цената, локалното население ќе ве однесе на вистинскиот пат. Излетот ќе започне во раните утрински часови, а ќе заврши во доцните попладневни часови. 

Во цената е вклучено: организиран превоз според планот и програмата. 

Шефшауен е најпопуларната туристичка дестинација во Мароко. Градот постои од 1471 година и го добил името по планината Риф на која се наоѓа, поточно формата на планинските врвови над градот, потсетувајќи на два рогови од коза. Постојат две објаснувања зошто градот е син - првото вели дека локалците го обоиле во сино, за да им изгледа син како море на комарците во лето и да го заобиколуваат, а другото вели дека Евреите, кои порано живееле во Шефшауен во многу голем број, го обоиле градот во сино, бидејќи тоа била бојата на нивниот бог. Местото е познато и по одлични ракотворби, оригинални сувенири и волнени производи што може да се купат тука. Поаѓањето на излетот е во раните утрински часови и од Фес до Шефшауен не очекува возење од околу 4 до 4 и пол часа. Потоа, ќе прошетаме по тесните и скриени улици низ овој навидум нереален град, со неизбежно силна инспирација за фотографирање која ја црпиме од многуте нијанси на сината боја, различните животни, како и луѓето облечени во традиционални носии. Одбираме еден од рестораните, ручаме и го користиме слободното време за индивидуални активности, купуваме сувенири слушајќи ги звуците на традиционалната мароканска музика на улиците и пиеме ладни пијалоци во овој уникатен град. Враќање во Фес.

Во цената на излетот е вклучено:

• организиран превоз според планот и програмата

Во цената на излетот не е вклучено:

• билети за локалитетот Казбу (Касбах) - стара тврдина во која има мал етнографски музеј и уметничка галерија (10МАД)
• ручек

Овој излет вклучува посета на уникатниот археолошки локалитет Волубилис, кој потекнува од римскиот период и тука некогаш бил сместен центарот на римската провинција. Остатокот од денот ќе го поминеме во разгледување на еден од четирите кралски градови – Мекнес. Поаѓаме наутро, започнуваме со посета на археолошкиот локалитет Волубилис (Volubilis). Местото за овој град било специјално избрано затоа што околното земјиште е погодно за одгледување маслинки, кои биле од исклучителна вредност за време на Римската империја. Археолошкиот локалитет е добро зачуван и ја посетуваме Триумфалната порта, куќа која го покажува целиот процес на цедење на маслиново масло, уживаме во сочуваните мозаици и ги посетуваме главните административни и религиозни градби. По посетата на археолошкиот локалитет, следува посета на мал музеј, а потоа го продолжуваме нашиот излет со возење кон Мекнес. Една од четирите кралски престолнини е позната по Мулај Исмаил, владетел од 17 и 18 век, кој во тоа време бил фасциниран од француската држава и толку смел, што дури и ја барал ќерката на францускиот крал за своја сопруга. Тој го издигнал Мекнес од пепел и го направил мегаломански град. Ги посетуваме познатите штали, каде што Мулај Исмаил чувал илјадници специјално избрани коњи, вештачко езеро кое порано го снабдувало градот со вода, потоа прекрасната порта на градот, која важи за една од најубавите и монументални порти во цело Мароко, фотографирање со слатки мајмуни на главниот градски плоштад и посета на традиционалната медреса. Вечераме тажин, кускус или друго традиционално јадење во еден од рестораните и по кратко слободно време се упатуваме назад кон Фес. 

Во цената излетот е вклучено:

• организиран превоз според програмата

Во цената на излетот не е вклучено:

• билет за Bou Inania во Мекнес (oколу 20 MAD)
• билет за месноста Волубилис (oколу 75MAD)
• ручек

Разгледување на Казабланка - Градот е основан од страна на португалците во 1755 година, а не од страна на шпанците, како што многумина би помислиле врз основ на името. Денес Казабланка е најголем град во Мароко, главно пристаниште и економски центар. За разлика од другите поголеми градови, како што се Маракеш и Фес, нема голема медина, туку во градот доминираат квартови со силен француски печат, наследство од колонијаниот период. На влезот во медината наидуваме на кафе Рик, причуениот пијано бар, кој не потсетува на култниот филм “Казабланка“ и најпознатиот филмски пар - Хемфри Богарт и Ингрид Бергман. Во градот се наоѓа и една од најголемите џамии на светот, џамијата Хасан II. 

Во цената на излетот е вклучено: услуга од лиценциран водич на англиски јазик. 

Во цената на излетот не е вклучено: влезница за џамијата Хасан II (140 MAD).

Hotel Orient Mintur *** е хотел со 3* по локална категоризација. Сместувачкиот објект располага со двокреветни соби со сопствен тоалет. Услугата е на база ноќевање со појадок (континентален појадок).

Yaad City hotel 3* е хотел со три звездички по локална категоризација. Сместувачкиот објект располага со двокреветни соби со сопствен тоалет. Услугата е на база ноќевање со појадок (континентален појадок).

Вебсајт https://www.yaadcityhotel.com/en/#0

Адреса Rue Ibn Aicha
Gueliz
40000 Marrakech
Morocco

Hotel Ibis Rabat Agdal е хотел со 3* по локална категоризација. Сместувачкиот објект располага со двокреветни соби со сопствен тоалет. Секоја соба поседува TV и клима уред, а сместувачкиот објект располага со базен. Хотелот се наоѓа во близина на ѓелезничката станица во Фес. Услугата е на база ноќевање со појадок (континентален појадок).

Hotel Ibis Fes 3 е хотел со 3* по локална категоризација. Сместувачкиот објект располага со двокреветни соби со сопствен тоалет. Секоја соба поседува TV и клима уред. Хотелот е оддалечен 3км од Националната библиотека на Кралство Мароко. Услугата е на база ноќевање со појадок (континентален појадок).

Atlas Les Almohades е хотел со 4* по локална категоризација. Сместувачкиот објект располага со двокреветни и трикреветни соби со сопствен тоалет. Секоја соба поседува клима уре, а сместувачкиот објект располага со спа центар. Хотелот е оддалечен 1.8км од џамијата Хасан II и 5км од плажа. Услугата е на база ноќевање со појадок.

Вебсајт https://www.hotelsatlas.com/