Турција патувања

Кападокија се наоѓа во централниот дел на Анадолија во Турција. Денес Кападокија е едно од најпосетените и најромантичните места на светот. Овој крај покажува и докажува дека Турција има многу повеќе од море и прекрасен брег! Секако, кога на природната убавина ќе се додаде гостопримство и вкусна храна, не е ни чудно што #ЦелСвет сака да го истражи ова магично парче земја... И не, Кападокија не се само балони... Кападокија е мнооогу, многу повеќе..! 

Пејсажите на овој турски предел се толку чудесни и магични што ќе помислите дека се наоѓате на друга планета. Вулканските ерупции и ерозијата, десеттици милиони години ги создавале овие пејасажи, кои изгледаат како природата да си поиграла со магично стапче! 

Пределот изобилува со природна убавина и богата историја. Подземни градови, цркви од рано христијанскиот период, замоци вклесани во карпи од османлиско време се само дел од историските споменици останати да сведочат за богатата историја на овој предел.

Кога ќе кажеме Кападокија, неизбежно е да не помислиме на балони, на стотици балони кои истовремено летаат над впечатливиот пејзаж. Ќе помислиме на нереалните слики од Инстаграм за кои мислевме дека се фотошопирани. Во Кападокија нема потреба од фотошоп. Секој призор, секоја глетка, секој агол околу нас е како на фотографиите од интернет.

Летање со балон во Кападокија е атракција која се наоѓа на врвот на бакет листите на многу луѓе, и не е тешко да се заклучи зошто. 

Регионот Кападокија е најпопуларна локација на светот за летови со балон. Секоја година, повеќе од половина од светските летови со балони се имаат одржано баш тука. Популарноста на овој регион за летови со балон не е само поради уникатниот пејсаж, туку и поради тоа што во просек 250 дена во годината се со погодни услови за летање, во споредба со просек од 60 дена во други делови од светот. 

Кападокија е единственото место во светот каде што може да видите стотици балони на небото секое утро додека го пиете првото кафе на прекрасните тераси украсени во традиционален турски стил.

Ја истражуваме Кападокија која навистина изгледа нереално.. Всушност “нереално” е и зборот кој најмногу го употребуваме додека сме на нашите патувања таму, бидејќи никој не успева да пронајде други зборови за да ја опише убавината на она што го гледаме…

Поаѓања

Патувања

Корисни информации

Овде ќе најдете корисни информации за самата дестинација, како и некои совети за ова патување.

Турција

ИНФОРМАЦИИ ПОВРЗАНИ СО КОВИД-19
За влез во Турција потребен е сертификат за вакцинација, со примена втора доза најмалку 14 дена пред влез во земјата, или со потврда за прележаност издадена од надлежен орган дека во последните 6 месеци е прележан COVID-19. Доколку не се поседува еден од наведените документи неопходно е да се приложи негативен PCR тест, не постар од 72 саата пред влез во Турција или негативен резултат на брз антиген тест не постар од 48 саата пред влез во земјата. 

ВИЗА
За државјани на Република Македонија кои туристички патуваат во Турција, не е потребна виза за влез во земјата. Рок на важност на пасошот мора да биде најмалку 6 месеци од датумот на враќање во Македонија.

ЛЕКОВИ, ВАКЦИНИ И ЗДРАВЈЕ
За патување во Турција не е потребен доказ за вакцинација за тропски болести, освен ако доаѓате од област зафатена со жолта грозница (области од Централна Африка или Јужна Америка). Препорачуваме на пат да понесете пробиотици, лекови за настинка и температура (пр. Фервекс, Риностоп) како и лекови за болка (пр. Бруфен, Кафетин) и доколку примате редовна терапија - лековите кои Ви се препишани.

ТЕМПЕРАТУРА (КЛИМА), ОБЛЕКА И ПАКУВАЊЕ
Кападокија има изразена контитентална клима, со топли лета и ладни зими. Со оглед на тоа што посетуваме песокливи и камени предели, погодно би било да носите топла, удобна облека и обувки. Заради живописните предели кои овој регион ги поседува и местата за пешачење, најдобро би било да понесете обувки (патики) со кои би можеле да пешачите во природа. Кодексот на облекување е произволен, но доколку посетувате религиозни објекти, задолжително е да носите облека што ги покрива нозете и рамената.

БЕЗБЕДНОСТ
Кападокија е регион со изразена безбедност, и со голема концентрација на туристи во текот на целата година. Локалното население е особено пријателски настроено кон туристите и сакаат да се дружат и запознаваат. Секако препорачуваме да водите сметка за Вашите пари и лични работи како што би воделе на било која друга дестинација.

ХРАНА, ПИЈАЛОЦИ И ВОДА
Турската кујна е една од петте најразновидни и најдобри светски кујни. Турската кујна е наследство од Отоманската кујна, која пак била фузија од Централно Азиската кујна, кујната на Блискиот Исток, но и Медитеранската, Источно Европската и Балканската кујна. Храната е вкусна и се припрема од сезонски производи. Чорбите се составен дел од скоро секој ручек.

Во Турција, генерално може да се каже дека нема лоша храна. Конкретно во местото Гореме, каде сме сместени, има околу 30-тина ресторани вкупно. Повеќето од нив служат превкусна традиционална храна – илјадници различни мезиња, специјалитети од зеленчук и месо, но има и ресторани кои служат и интернационална храна (бургери, пица, итн.). 

Регионот Кападокија е познат вински регион во Турција, па така, ќе имате прилика да пиете одлично и евтино домашно вино. 

Препорачуваме да пиете флаширана вода.

ТЕЛЕФОН И КОМУНИКАЦИЈА
Нашите мрежи функционираат во Турција. Најголеми оператори се Turkcell, Vodafone и Avea. Можете слободно да го користите Вашиот мобилен телефон во Турција доколку Вашиот оператор овозможил меѓународен роаминг. Можете да купите и локална СИМ картичка (На пример: Tourist Welcome Pack при-пејд пакетот од Turkcell со 20GB интернет кој чини околу 17 евра, а може да се најдат и неколку други пакети за туристи). При слетување на аеродромот во Истанбул и за време на преседнувањето, од штандовите на Turkcell може да се купат SIM картички. Генерално сите сместувачки објекти и ресторани имаат добра Wi-Fi конекција.

СТРУЈА
Што се однесува до електрична енергија, напонот е ист како кај нас и не ви се потребни адаптери за струја.

ПАРИ, ПЛАЌАЊЕ И ТРОШОЦИ
Официјалната и основна валута во Турција е Турска Лира. Односот на валутата е следен:
1 EUR = 15.54 TRY 
1 USD = 14.24 TRY
* Ова е курсот во моментот на објавување на овој текст. Истиот е променлив и треба да го проверите пред патување. 

Постои можност за користење на платежни картички, пред сѐ за вадење пари од банкомат, но не треба премногу да сметате на плаќањата со картичка. Најдобро е со Вас секогаш да имате готовина и тоа во локална валута. Патниците на ова патување трошат помеѓу 200 и 400 евра, без факултативните излети, но сепак, станува збор за индивидуална работа, па земете ја оваа информација со резерва. Можете да носите евра или долари, но сепак подобро е да менувате евра на самата дестинација. Имајте во предвид дека во Гореме, Кападокија нема менувачници, па пари може да менувате само во пошта, каде ви е потребен пасош. Поштата се наоѓа малку подалеку од центарот на Гореме. Втора опција за менување пари се некои продавници или туристички агенции, каде самите вработени може да ви направат услуга. Можете да се обратите и до нашиот водич на самата дестинација кој ќе ви даде дополнителни насоки.

ВРЕМЕНСКА ЗОНА
UTC+3, односно во текот на зимското сметање на времето разликата помеѓу Македонија и Турција е 2ч, а во текот на летното сметање на времето е 1ч, затоа што Турција не преминува на летно сметање на времето.